المؤامرة....1

ولتاني مرة بكتب بالعربي، أسهل وبأكون على طبيعتي.

من كام يوم سمعت رواية غريبة، إن اللي احنا فيه ده كله تمثيلية، قصدي الثورة ومحاكمة مبارك والتغيير ده كله تمثيلية. واللي قاللي الرواية دي كان شبه متأكد من الكلام اللي بيقوله لأنه أخدها من المصدر الأساسي وجه قاللي الكلام بالحرف. البك صاحب الرواية بيقول شايف إن مبارك حيطلع براءة، وحيعيش بفلوسه ويغيظ الشعب المصري كله وبدل ما احنا اللي نموت مبارك بالعار اللي هو فيه، هو اللي حيقضي علينا بالإحباط. وبيقول كمان إن الجيش متواطئ بدليل إن مبارك مهربش وكأنه مطمن من اللي بيحصل، وطبعاً ده كله من تخطيط أس البلاوي أمريكا.

أنا سمعت الحدوتة دي من هنا وجاتلي حالة هيستيرية، ابتدت بالضحك، قلت لنفسي "معقولة الكلام ده؟ يعني احنا كلنا نطلع غلط وعمرو مصطفى هو اللي بيفهم فينا كلنا؟" وبعدين لما هديت وقعدت أفكر وأمزمز في الكلام اللي بيفكرني بفيلم هابط، قلت طب لو الرواية صح، ايه حيحصل؟ آه حنشوف أيام سودة إن شاء الله، لأن اللي حييجي بعد مبارك حيورينا النجوم في عز الظهر والمصريين نفسهم حينكسروا ومش حنقدر نصدق أي حاجة تانية، لأننا حنحس إن كل حاجة حوالينا هي مجرد كذبة كبيرة، بالعامية حنحس إننا مضروبين على قفانا.

ولو الرواية غلط، وأتمنى فعلاً إنها تكون كدة، ده برضه يخلينا نشغل عقولنا ونشوف مصدر الكلام دة وسبب نشره للرواية الغريبة دي، آه نسيت أقول لكم إن الأخ الفاضل اللي قال الكلام ده كان واحد تقيل قوي في الحكومة اللي فاتت وطبعاً الثورة مش جاية على مزاجه ولا مصالحه، فممكن جداً إنه بيقول الكلام ده عشان نحس بالإحباط أو نفقد الثقة في التغيير اللي كان وراه الشعب المصري بفئاته المختلفة، وممكن جداً يكون الكلام ده منتشر بين الناس عشان المصريين ماشيين بنظام "اللي يتلسع من الشوربة ينفخ في الزبادي"، لو الحكاية كدة يبقى ده ذنب الحكام اللي فاتوا والفساد اللي كان في كل حتة ومنتشر لدرجة خلت الناس معندهاش ثقة في أي حد ولا أي حاجة.

المصيبة الأكبر(آه في مصيبة أولانية اللي هي الرواية الغريبة سواء كانت صح أو غلط) إن في ناس برة مصر ومن دول عربية بتقول نفس الحكاية عن مصر وعن الدول التانية....

ونكمل بكرة مع نظرية المؤامرة