مجموعة قصصية تحت عنوان "أحبني لتعرف من أنا" بقلم لبنى غانم وإيناس حليم صادر عن دار المصري للنشر والتوزيع، للأسف لسة مقرتش الكتاب، إنما بالصدفة لقيت مجموعة الكتاب على الفيس بوك، العنوان جذب انتباهي جداً حسيت إنه عنوان حالم ورقيق وفيه شئ من الحقيقة.
"ياللي ظلمتوا الحب وقلته وعدته عليه" صوت أم كلثوم بيداعب أذني في الوقت الحالي وأنا بفكر في عنوان المجموعة القصصية دي، يعني دايماً نقول إن الحب أعمى ومراية الحب عميا والكلام ده كله، بس غير إن الحب من أسمى وأرق القيم الموجودة في حياتنا وبتخلينا نعيش، مش بس عشان بنحس إن إحنا مرغوبين ومش بس عشان بنحس إن في شخص قريب لينا، بس برضه عشان لما بنحب ولما بيكون حد بيحبنا، بنقدر نعرف أشياء كتير حلوة عن نفسنا وغيرنا بيعرف الأشياء دي عننا.
يعني مثلاً لو شخص عصبي ومكشر على طول ومضغوط من الحياة وكتوم، أكيد في مرحلة من حياته حيلاقي الحد اللي يعرف يخترق الغيامة دي، حد يعرف يفك طلاسم الشخصية الجامدة ويكون معاه مفتاحها. لما تحب حد، حسب اعتقادي عشان ممكن جداً أكون غلط، حتعرف ايه الحاجات الحلوة اللي فيه وهو برضه حيعرف حاجة كويسة عن نفسه. وبرضه لو حد بيحبك حيعرف كويس إنت مين، بعيد عن كل الرتوش اللي بنرسمها لشخصياتنا وبعيد عن كل المظاهر اللي الظروف ساعات كتير بتجبرنا إننا نتلون بيها، فالحب بيضعف المناعة وبيخلي الإنسان قريب من حقيقته الطبيعية، وأكيد لو حد بيحبك حيعرف ايه الكويس اللي فيك ومهما الناس شافتك من زاوية معينة، هو حيشوفك من الزاوية الصح، مش عارفة لو كلامي معقول أو لأ، بس هو ده اللي أنا شايفاه، صح أو غلط، الوقت هو اللي حيحكم.
عنوان جميل لمجموعة قصصية أتمنى إن يكون عندي الوقت إني أقراها،
سلام
No comments:
Post a Comment