أول مرة.....

لسة كنت بفكر امبارح إن نشوة إنك تعمل حاجة لأول مرة متتقدرش بتمن، مش بس عشان تحس إنك بتعمل حاجة جديدة وتكسر بيها الروتين... لأ، بس عشان صعب إنك تنبهر بحاجة. أنا فاكرة كويس إني لما كنت طفلة، الكبار دول بالنسبة لي كانوا زي نجوم السينما، أشكال مختلفة.... أتعلم منهم حاجة أو حركة أو حتى كلمة جديدة. وشوش كانت بتضحك قدامي أو تبتسم عشان مجرد إني أضحك ويبهروني، مكانوش عارفين إنهم مش محتاجين يعملوا نفسهم بهلوانات قدامي لإني كنت بالفعل مسحورة بالعالم بتاعهم.

قعدت أفكر وأسرح في الذكريات الجميلة والبسيطة اللي كانت بتفرحني.....

لسة فاكرة أول مرة بابا أخدني فيها السينما مع أخويا، كانت سينما أمير في إسكندرية واتفرجنا على فيلم كرتون مش فاكراه...ز سينما أمير كانت أحسن سينما في الوقت ده. دلوقتي بعدي قدامها وبخاف أدخلها عشان مبقتش زي الأول، خدمة رديئة.... مفيش نظافة كافية والتذاكر بقت رخيصة بالنسبة للي موجود دلوقتي، بالعربي جمهورها مبقاش محترم زي زمان!

وبرده فاكرة إني في نفس اليوم اللي رحت في السينما ده، رحت جنينة الحيوانات وقعدت أأكل الفيل أبو زلومة والزرافة اللي لسة كأني شايفاها قدامي!

فاكرة أول مرة أمي ودتني مع أخويا مكتبة عامة، كانت في النادي! مكناش عارفين نتعامل في المكان الهادي النضيف ده، سحبنا كتب مش فاهمين بتقول ايه وقعدنا شوية وبعدين مشينا من غير ما نرجع الكتب لمكانها، أمي لما عرفت فضلت تأنب فينا وطلعنا اعتذرنا لأمينة المكتبة اللي كانت رقيقة قوي...

فاكرة أول مرة، بابا جه وقالي وهو منفعل "إنتي بطلتي تقري ليه؟؟؟؟ هو عشان كبرتي على ميكي وعلاء الدين، مش هتقري خلاص؟" وجابلي بعدها "حول العالم في 200 يوم".... كتاب ضخم بالنسبة لبنت عندها 11 سنة بس سحرني وقعدت طول أجازة الصيف أقرأ فيه وأنا بحلم باليوم اللي أسافر فيه اليابان :)

فاكرة أول مرة خرجت مع صاحبتي أتفسح من غير حد كبير يكون معانا، كنا في العجمي في الوقت ده واتفقنا نروح البيطاش.... كانت مكان "روش" في الوقت ده، محلات كتير وزحمة! جو مثالي لأي مراهقة... كنت رفيعة قوي الوقت ده، لما بشوف صوري أقول "أنا كنت أنفع عارضة أزياء" وأضحك.....

فاكرة أول مرة أكلت فيها McDonald's وكنت هرجع أصلاً، مكانش عاجبني خالص.... سبحان الله ع الإدمان اللي بقيت فيه!

فاكرة لما مكانش فيه الموبايل ده، كنت بمشي أدور في الشوارع على كابينة الميناتل عشان أكلم البيت أو حد من صحابي...

فاكرة برده أول مرة جبت فيها الموبايل وكنت فرحانة بيه قوي، كان على قد حاله وكان هدية... قعد معايا أكتر من 4 سنين... واحد صاحبي شافه قعد يتريق عليه ويضحك، ساعتها اتحرجت قوي وأصريت إني أحوش وأجيب واحد تاني، وحصل! بس دلوقتي بخبط دماغي في الحيط لإني مكنتش عارفة قيمة الموبايل، كان عليه ذكريات حلوة وكان بيفكرني بالشخص اللي جابهولي...

فاكرة أول مرة وقفت على مسرح المدرسة، كان عندي 5 سنين، كنت خايفة قوي وقعدت أدور على ماما عشان مكنتش شايفاها قدامي... الوضع مختلفش كتير، لسة برتعش ولسة بخاف!

فاكرة أول مرة مسكت قلم الروج بتاع ماما من وراها وحطيت منه ومسحته، هي طبعاً عرفت لما لقته مكسور، وكانت علقة محترمة!

فاكرة أول مسابقة رقص اشتركت فيها وكسبتها، كان عندي 12 سنة تقريباً، وكسبت الجايزة الأولي اللي كانت فطيرة مشلتتة **مسخرة، أنا عارفة** :D

فاكرة أول مرة حد قالي فيها "أنا معجب بيكي" كنت طايرة من الفرحة ساعتها، دلوقتي من كتر ما سمعتها، بقيت ابتسم ابتسامة صفرا وأرد بكل هدوء وأقول Merci وأكمل اللي كنت بعمله عادي ولا كأني سمعت حاجة :)

فاكرة أول فلوس أكسبها، كانوا 150 جنيه عشان ترجمت كام ورقة.... أخدت الفلوس ومشيت في الشارع كأني ملكة وبقيت خايفة ليقعوا مني ولا يتسرقوا... 150 جنيه يا جدعان!! 

فاكرة أول مرة اتنشرت قصة باسمي في مجلة غالباً محدش بيقراها... بس يوميها تخيلت إني ممكن في يوم أبقى كاتبة مشهورة وأكسب جايزة نوبل......

......................................................................................................................